పద్మినీ ఏకాదశి 2026: అధిక మాస వ్రత కథ, పూజా విధానం & మహత్త్వం (పద్మపురాణం)

అధిక మాసములో శుద్ధ (శుక్ల) ఏకాదశికి "పద్మినీ ఏకాదశి" అని పేరు. పద్మపురాణంలోని శ్రీకృష్ణ – యుధిష్ఠిర సంవాదంలో ఈ వ్రత మహిమ వివరించబడింది. ఈ వ్రతాచరణతో పద్మనాభుడైన భగవంతుని యందు అచంచల భక్తి కలుగుతుంది.

పూజా విధానం

• ఏకాదశి నాడు గంధ, పుష్ప, ధూప, దీప, నైవేద్యములతో పురుషోత్తముడైన భగవానుని పూజించవలెను.

• భక్తి నిష్ఠలతో ఉపవాసముండి భగవంతుని నామ శ్రవణము, కీర్తనము చేయవలెను.

  Advertisement

• మరుసటి రోజు (ద్వాదశి) యథావిధిగా పారణ చేయవలెను.

పద్మినీ ఏకాదశి వ్రత కథ (పులస్త్యుడు – నారదుని సంవాదం)

పూర్వము త్రేతాయుగమున హైహేయ వంశమున కార్తవీర్యార్జునుడు అను రాజు ఉండెను. అతనికి వేయిమంది భార్యలు ఉన్నను సంతానము కలుగలేదు. రాజ్యభారమును మంత్రికి అప్పగించి, పట్టమహిషి అయిన పద్మినీ దేవిని వెంటబెట్టుకొని మందగిరి పర్వతముపై పదివేల సంవత్సరములు తపస్సు చేసిరి.

పద్మినీ దేవి ఇక్ష్వాకు వంశపు రాజు సత్యహరిశ్చంద్రుని కుమార్తె. సుదీర్ఘ తపస్సుచే భర్త బలము క్షీణించుట గమనించిన ఆమె, అత్రి మహర్షి భార్య అయిన అనసూయా దేవి సన్నిధిలో శరణాగతయై — తన భర్త సుందరాకృతిని పొందుటకు, మహాపరాక్రమశాలి అయిన కుమారుడు కలుగుటకు మార్గము తెలుపమని ప్రార్థించెను.

అనసూయా దేవి ఇట్లనెను: "ఓ పద్మినీ! నీవు, నీ భర్త కలిసి అధిక మాసంలో శుద్ధ ఏకాదశి తిథి యందు ఉపవాసముండి శ్రీకృష్ణారాధన చేయవలెను. ఈ ఏకాదశి అత్యంత పవిత్రమైనది; దీనికి పద్మినీ ఏకాదశి అను శుభనామము కలదు. ఈ వ్రతమును ఆచరించిన మహాపరాక్రమశాలి అయిన కుమారుడు జన్మించును." పద్మినీ దేవి అట్లే ఆచరించి మహాబలశాలి అయిన కుమారుని పొందెను.

పూర్వము కార్తవీర్యార్జుని తండ్రి కూడా ఎంతో నిష్ఠతో ఈ వ్రతమును ఆచరించియే అతిపరాక్రమవంతుడైన కార్తవీర్యార్జునుని పుత్రునిగా పొందెనని పులస్త్యుడు నారదునికి వివరించెను. ఈ విషయమునే శ్రీకృష్ణుడు యుధిష్ఠిర మహారాజుతో చెప్పెను.

శాస్త్ర ప్రమాణం & మరో పేరు

ఈ అధిక మాస మహిమ పద్మపురాణంలోని ఉత్తర ఖండంలో 29వ అధ్యాయము నుండి 37వ అధ్యాయము వరకు చెప్పబడినది. ఈ ఏకాదశిని "కామదా ఏకాదశి" అని కూడా అందురు.

వ్రత ఫలం

భక్తి నిష్ఠలతో ఉపవాసముండి, పురుషోత్తమ పూజ సల్పి, భగవంతుని నామ – రూప – గుణ – లీలా మహిమలను శ్రవణ, కీర్తనము చేసినవారు భగవత్సాన్నిధ్యమును, ఆయన పాదకమలముల సేవా భాగ్యమును శాశ్వతముగా పొందగలరు.

తరచుగా అడిగే ప్రశ్నలు

పద్మినీ ఏకాదశి అంటే ఏమిటి?

అధిక మాసం (పురుషోత్తమ మాసం)లోని శుద్ధ (శుక్ల) ఏకాదశినే పద్మినీ ఏకాదశి అంటారు. దీనిని కామదా ఏకాదశి అని కూడా అంటారు.

పద్మినీ ఏకాదశి కథ ఏ గ్రంథంలో ఉంది?

పద్మపురాణం ఉత్తర ఖండంలో 29–37 అధ్యాయాలలో, శ్రీకృష్ణ – యుధిష్ఠిర సంవాద రూపంలో ఈ వ్రత మహిమ చెప్పబడింది.

శుభమస్తు · సమస్త లోకాః సుఖినో భవంతు 🙏