భారతీయం

• కారుమేఘాలు కమ్ముతున్నాయి. ఏ క్షణంలోనైనా విపరీతంగా వర్షం కురుస్తుంది. వేసిన ముగ్గు వర్షంలో కలిసిపోతుంది.
  అయినప్పటికీ… ఆమె ముగ్గు వేస్తూనే ఉంది!
  అదీ… సంప్రదాయం!

• అంతర్జాతీయ ఖ్యాతి గడించిన వైద్యుడు, అమెరికాలో నివసిస్తున్నా,
  ఊరికి వచ్చినప్పుడల్లా తనకు పాఠాలు చెప్పిన పండితుల పాదాలకు నమస్కరిస్తాడు.
  అదీ… సంస్కారం!

• ఖగోళశాస్త్రంలో ప్రావీణ్యం సంపాదించిన పండితుడు,
  అయినప్పటికీ, గ్రహణం విడిస్తే గానీ ఆహారం గ్రహించడు.
  అదీ… నమ్మకం!

• పరమాణు శాస్త్రాన్ని పిండి పిప్పిచేసిన పండితుడు కూడా,
  పౌత్రుడి జడ తొలగింపునకు పుణ్యక్షేత్రానికే వస్తాడు.
  అదీ… ఆచారం!

• అంతరిక్ష విజ్ఞానాన్ని అరచేత పట్టిన అతిరథుడు కూడా,
  పితృదేవతలకు పిండప్రదానం చేస్తాడు.
  అదీ… సనాతన ధర్మం!

• అత్తింటికి బయలుదేరే ముందు, ఇంటి ఆడపడుచు పెద్దలకు పాదాభివందనం చేసి పయనమవుతుంది.
  అదీ… పద్ధతి!

• పెద్ద చదువులు, గొప్ప ఉద్యోగాలు, ఖ్యాతి ఉన్నా,
  పెళ్లి పీటలపై వధువు అందంగా, వినమ్రంగా ఉంటుంది.
  అదీ… సంస్కృతి!

• భార్య పక్షవాతం బారిన పడి మంచానికే పరిమితమైపోయినా,
  భర్త ఆమెకు భరోసాగా నిలబడి, భారమంతా మోస్తాడు, అన్నీ తానై ఆ పత్ని సేవ చేస్తాడు.
  అదీ… దాంపత్యం!

• జీవించే అవకాశాలు తక్కువగా ఉన్నా,
  ప్రాణం నిలవాలనే ఆశతో కుటుంబం లక్షలు ఖర్చు చేసి వెంటిలేటర్‌పై ఉంచుతుంది.
  అదీ… అనుబంధం!

ఇదంతా… భారతీయతే!