తల్లితండ్రుల గౌరవాన్ని తగ్గిస్తున్న నేటి యువత

— బి. మల్లికార్జున దీక్షిత్, ఫ్యామిలీ కౌన్సిలర్ & కౌన్సిలింగ్ సైకాలజిస్ట్

పరిచయం

మొదటగా, నేను రాసే విషయాలు అందరికీ వర్తించకపోవచ్చు.
నా వద్దకు వచ్చే ఫోన్ కాల్స్ ఆధారంగా ఈ ఆర్టికల్స్ రాస్తూ ఉంటాను.

మన తరం వరకు పిల్లలు, తమ తల్లితండ్రులకు వివాహానికి ముందు, తరువాత కూడా గౌరవం ఇచ్చేవారు.
ప్రతి విషయాన్ని వారితో సంప్రదించి సలహా తీసుకునేవారు.

తల్లితండ్రుల కష్టం

సాధారణంగా, పిల్లలు తల్లితండ్రులకంటే ఎక్కువగా చదువుకున్నవారు, ఎక్కువగా సంపాదించేవారు అవుతారు.

• ప్రతి తండ్రి తన కంటే తన పిల్లలు విద్యావంతులు కావాలని, సంపాదన పరులు కావాలని ఆశిస్తాడు.
• పిల్లల చదువు కోసం రాత్రింబవళ్లు శ్రమించి, ఆస్తులు అమ్ముకొని, నిద్ర, సుఖాలు త్యాగం చేసిన తల్లితండ్రులు ఎందరో.
• పిల్లల ఆరోగ్యం కోసం ఆసుపత్రుల చుట్టూ తిరిగి, చికిత్స కోసం ధనం ఖర్చు చేసి, త్యాగం చేసిన తల్లితండ్రులు ఎందరో.
• అంగవైకల్యం తో జన్మించిన పిల్లల కోలుకోవడానికి తమ జీవితాన్ని పణంగా పెట్టిన వారు ఉన్నారు.
• కోలుకోని పరిస్థితుల్లో కూడా వారిని కంటికి రెప్పలా చూసుకుంటూ జీవించే తల్లితండ్రులు ఉన్నారు.

అందుకే "తల్లితండ్రులు ప్రత్యక్ష దైవాలు" అని అంటారు.

మునుపటి తరం vs నేటి తరం

మునుపటి తరం:

• తల్లితండ్రుల విద్య, సంపాదన స్థాయిని పరిగణనలోకి తీసుకోకుండా గౌరవం ఇవ్వడం, ప్రేమగా చూడడం తమ బాధ్యత అని భావించేది.

నేటి తరం:

• "వారికేమి తెలుసు?"
• "మేమే చదువులో, తెలివిలో, సంపాదనలో గొప్ప" అనే భావన పెరిగిపోతోంది.
• తల్లితండ్రులను పట్టించుకోకుండా వృద్ధాశ్రమాలలో వదిలే పిల్లలు పెరుగుతున్నారు.
• నెలల తరబడి తల్లితండ్రులతో మాట్లాడని పిల్లలు ఉన్నారు.
• కేవలం డబ్బు పంపడమే బాధ్యతగా భావించే పిల్లలు కూడా ఉన్నారు.
• ప్రేమ, ఆప్యాయత, సహవాసం తగ్గిపోయింది.

కారణం

• పిల్లలు చిన్నవయసులో ఉన్నప్పుడు సంస్కృతి, భాష, మంచి–చెడు, నీతి చెప్పకపోవడం.
• మొబైల్ గేమ్స్, స్క్రీన్ టైమ్ పెరగడం.
• నీతి కథలు చెప్పే పెద్దవారు (అమ్మమ్మ, నానమ్మ, తాతయ్య) లేకపోవడం.

విద్య ఉన్నా విలువలు లేకపోతే

ఇప్పటి చదువుతో ఇంగ్లీష్, సైన్స్, ఇంజనీరింగ్, మెడిసిన్ లో ప్రావీణ్యం సంపాదించవచ్చు.
కానీ —

• వివాహానికి విముఖత
• విడాకులు పెరగడం
• అనైతిక సంబంధాలు, హింస పెరగడం జరుగుతోంది.

మూల్యాలు జ్ఞాపకం ఉంచుకోవాలి

మన దేశం హిందూ సంస్కృతికి పుట్టినిల్లు.
విదేశీయులు మన సంస్కృతిని మెచ్చుకుంటున్నారు, కానీ మనం దూరమవుతున్నాం.

మాతృదేవో భవ – పితృదేవో భవ అని గుర్తుంచుకోవాలి.
తల్లితండ్రులకు తగిన గౌరవం ఇవ్వడం, కొన్ని విషయాల్లో వారిని సంప్రదించడం నేటి యువతకు అత్యవసరం.

ముగింపు

మీకు తల్లితండ్రులే లేకుంటే మీకు పుట్టుకే ఉండదు.
మీరు వారిని గౌరవిస్తే — రేపు మీ పిల్లలు కూడా మిమ్మల్ని గౌరవిస్తారు.