రాహు కేతు దశా రహస్యాలు | పరాశర సిద్ధాంతం ప్రకారం రాహు కేతు ఫలితాలు

🔱 రాహు–కేతు దశా రహస్యాలు 🔱

జ్యోతిషశాస్త్రంలో రాహు, కేతు దశల విశిష్టత

జ్యోతిషశాస్త్రములో అత్యంత క్లిష్టమైన మరియు గంభీరమైన దశలుగా రాహు, కేతు దశలు పరిగణించబడినవి. సూర్యుడు, చంద్రుడు, గురువు వంటి గ్రహాల ఫలితాలను నిర్ణయించుట కొంత సులభమైనప్పటికీ, రాహు–కేతువుల ఫలితాలను నిర్ణయించుటకు ప్రత్యేక నియమములు అవసరమవుతాయి. అందువల్ల పరాశర మహర్షి వీరి ఫలిత నిర్ణయానికి విశేషమైన విధానాన్ని బోధించారు.

రాహు, కేతువుల స్వభావం

రాహువు, కేతువు స్వయంగా స్థూల శరీరము లేని ఛాయాగ్రహములు. అందుచేత వీరు తాము ఉన్న రాశి అధిపతి, తాము ఉన్న భావము, తాము యుతి పొందిన గ్రహము, తాము పొందిన దృష్టి ఆధారంగా ఫలితములను ప్రసాదించుదురు.

పరాశర సిద్ధాంతంలో రాహు–కేతువుల ఫలిత నిర్ణయం

పరాశర సిద్ధాంతంలో ఒక ప్రధాన నియమము ఏమిటంటే రాహు, కేతువులు తమతో సంయోగము కలిగిన గ్రహ ఫలితములను ముందుగా ఇస్తారు. సంయోగము లేకపోతే తాము ఉన్న రాశి అధిపతి ఫలితములను ఇస్తారు. అది కూడా బలహీనమైతే తమపై దృష్టి కలిగిన గ్రహ ఫలితములను ఇస్తారు.

రాహువు భౌతిక ప్రపంచ విస్తరణకు కారకుడు. విదేశీ సంబంధములు, అనూహ్య లాభములు, రాజకీయ ప్రభావము, జనాకర్షణ, ఆధునిక సాంకేతిక విద్య, అసాధారణ మార్గముల ద్వారా అభివృద్ధి రాహు ప్రభావములో కనిపించును.

కేతు దశ యొక్క ప్రభావం

కేతువు విరక్తి, మోక్షము, మంత్రసిద్ధి, తపస్సు, గూఢవిద్యలు, ఆధ్యాత్మిక అనుభవములు, అంతర్ముఖ జీవనానికి కారకుడు. కేతు దశలో చాలామంది జీవిత లక్ష్యమును పునఃపరిశీలించుట ప్రారంభిస్తారు.

రాహు దశలో శుభాశుభ ఫలితాలు

రాహువు కేంద్ర లేదా త్రికోణ స్థానములలో ఉండి యోగకారక గ్రహ సంబంధము కలిగినచో ఆశ్చర్యకరమైన అభివృద్ధి కలుగజేయగలడు. సాధారణ స్థితిలో ఉన్న వ్యక్తిని ఉన్నత స్థితికి చేర్చగల శక్తి రాహువునకు ఉన్నది. అయితే రాహువు పాపపీడితుడై షష్ట, అష్టమ, ద్వాదశ సంబంధములు కలిగినచో మానసిక ఆందోళనలు, న్యాయవ్యవహారములు, మోసములు, అపకీర్తి, అనిశ్చిత పరిస్థితులు కలుగవచ్చును.

కేతు దశలో శుభాశుభ ఫలితాలు

కేతువు శుభస్థితిలో ఉన్నచో ఆధ్యాత్మిక అభివృద్ధి, మంత్రసిద్ధి, గురుకటాక్షము, గూఢజ్ఞానము ప్రసాదించును. కేతువు బలహీనమైతే ఒంటరితనము, వియోగము, అనూహ్య నష్టములు, అసంతృప్తి కలుగవచ్చును.

రాహు మహాదశలో కేతు అంతర్దశ, కేతు మహాదశలో రాహు అంతర్దశ సాధారణముగా జీవితములో ఒక కీలక మలుపును కలిగించును. పాత జీవిత విధానము ముగిసి కొత్త మార్గము ప్రారంభమగుట తరచుగా కనిపించును.

రాహు–కేతు దశలను పరిశీలించవలసిన విధానం

పరాశర సంప్రదాయంలో రాహు,కేతు దశలను పరిశీలించునప్పుడు ఈ క్రమము అనుసరించవలెను. రాహు/కేతు స్థానం, రాశ్యాధిపతి బలం, యుతి గ్రహములు, దృష్టులు నవాంశ స్థితి, దశా-అంతర్దశ, గోచార గురు, శని. ఈ నియమములను పాటించకుండా కేవలం రాహు దశ లేదా కేతు దశ అని మాత్రమే ఫలితములు చెప్పుట శాస్త్రసమ్మతము కాదు.

ముగింపు

రాహువు ప్రపంచమును చూపించును. కేతువు పరమార్థమును చూపించును. రాహువు బాహ్య విజయమునకు దారి తీస్తే, కేతువు అంతర్గత జ్ఞానమునకు దారి తీస్తాడు. అందువల్ల ఈ రెండు దశలు జీవితములో అత్యంత పరివర్తనాత్మక కాలములుగా పరిగణించబడతాయి...

మరిన్ని జ్యోతిష విషయాలకు సంప్రదించండి:

చింతా గోపిశర్మ సిద్ధాంతి
పెద్దాపురం – 533437
సెల్ : 9866193557
ఫోన్ : 098661 93557