ఆషాఢంలో గోరింటాకు ఎందుకు పెట్టుకుంటారు

ఆషాఢ మాసం ప్రారంభమైన తర్వాత, హిందూ సంప్రదాయంలో మహిళలు గోరింటాకు (మెహందీ / హెన్నా) పెట్టుకోవడం ఒక సాధారణ, కానీ గాఢమైన ఆచారంగా కొనసాగుతోంది. దీని వెనుక ఉన్న ఆధ్యాత్మిక, ఆరోగ్య పరమైన, సాంస్కృతిక కారణాలు ఇవే:

ఎందుకంటే

జ్యేష్ఠ మాసంలో కురవడం మొదలైన వర్షాలు ఆషాఢం నాటికి ఊపందుకుంటాయి. అలా తరచూ వర్షపు నీటిలో నానక తప్పదు. ఇక పొలం పనులు చేసుకునేవారు , ఏరు దాటాల్సి వచ్చేవారు… ఈ కాలంలో కాళ్లూ , చేతులను తడపకుండా రోజుని దాటలేరు. అలాంటి సమయంలో చర్మవ్యాధులు రావడం , గోళ్లు దెబ్బతినడం సహజం. గోరింటాకు ఈ ఉపద్రవాన్ని కొన్ని రోజుల పాటు ఆపుతుంది. ఆషాఢమాసం నాటికి గోరింట చెట్టు లేత ఆకులతో కళకళలాడుతూ ఉంటుంది. ఆ సమయంలో గోరింటను కోయడం వల్ల చెట్టుకి ఏమంత హాని కలుగదు. పైగా లేత ఆకులతో చేతులు ఎర్రగా పండుతాయి.

ఆషాఢం నాటికి వాతావరణం ఒక్కసారిగా చల్లబడిపోతుంది. వాతావరణంలో అకస్మాత్తుగా వచ్చే ఈ మార్పు వల్ల శరీరంలో కఫసంబంధమైన దోషాలు ఏర్పడతాయి. గోరింటాకుకి ఒంట్లోని వేడిని తగ్గించే గుణం ఉంది. అలా బయట వాతావరణానికి అనుగుణంగా మన శరీరాన్ని కూడా చల్లబరిచి దోషాలబారిన పడకుండా చేస్తుంది గోరింట.

ఆషాఢంలో కొత్త పెళ్లి కూతుళ్లు తమ పుట్టింటికి చేరుకోవడం ఆనవాయితీగా వస్తోంది. ఆ సమయంలో తమ చేతులకు పండించుకునే గోరింట , వారికి తమ సౌభాగ్యాన్ని గుర్తుచేస్తుంది. పుట్టింట ఉన్న మనసు , మెట్టినింట ఉన్న భర్త ఆరోగ్యాన్ని కాంక్షిస్తుంది. వేళ్లకి గోరింట పెట్టుకోవడం వల్ల కంటికి నదరుగానే కాకుండా గోళ్లు పెళుసుబారిపోకుండా , గోరుచుట్టు వంటి వ్యాధులు రాకుండా ఉంటాయి.

ఆయుర్వేదం ప్రకారం గోరింటి ఆకులే కాదు పూలు , వేళ్లు , బెరడు , విత్తనాలు… అన్నీ ఔషధయుక్తాలే ! గోరింట పొడిని మందుగా తీసుకోవడం , గోరింటతో కాచిన నూనెని వాడటం మన పెద్దల చిట్కావైద్యంలో ఉన్నదే ! కేవలం ఆషాఢంలోనే కాదు… అట్లతద్దినాడూ , శుభకార్యాల సందర్భంలోనూ గోరింటాకు పెట్టుకోవాలని పెద్దలు సూచిస్తూ ఉంటారు. అలా ఏడాదికి కొన్నిసార్లైనా గోరింట అందించే ఆరోగ్యాన్ని అందుకోవాలన్నది పెద్దల ఉద్దేశం కావచ్చు.

ఆషాఢంలో గోరింట పెట్టుకోమన్నారు కదా అని చాలామంది ఎక్కడపడితే అక్కడ దొరికే కోన్ల మీద ఆధారపడుతూ ఉంటారు. గోరింట మన శరీరానికి తాకినప్పుడు అందులో ఉండే లాసోన్‌ అనే సహజమైన రసాయనం వల్ల ఎరుపు రంగు ఏర్పడుతుంది. కానీ చాలా రకాల కోన్లలో , కృత్రిమంగా ఎరుపు రంగుని కలిగించే రసాయనాలు కలుపుతుంటారు. వీటివల్ల ఆరోగ్యం మాట అటుంచితే అలెర్జీలు ఏర్పడే ప్రమాదం కూడా ఉంది. కాబట్టి ఆషాఢంలో పుష్కలంగా లభించే గోరింటాకుని వాడుకునేందుకే ప్రాధాన్యతని ఇవ్వాలి

తరచుగా అడిగే ప్రశ్నలు

వర్షాకాలంలో గోరింటాకు చర్మాన్ని, గోళ్లను ఎలా కాపాడుతుంది?

ఆషాఢం నాటికి వర్షాలు ఊపందుకొని కాళ్లూ చేతులు తరచూ తడుస్తాయి, దాంతో చర్మవ్యాధులు, గోళ్లు దెబ్బతినడం సహజం. గోరింటాకు ఈ ఉపద్రవాన్ని కొన్ని రోజుల పాటు ఆపుతుంది, గోరుచుట్టు వంటి వ్యాధులు రాకుండా చూస్తుంది.

గోరింటాకు శరీర వేడిపై ఎలా పనిచేస్తుంది?

ఆషాఢంలో వాతావరణం ఒక్కసారిగా చల్లబడటంతో శరీరంలో కఫ సంబంధమైన దోషాలు ఏర్పడతాయి. గోరింటాకుకు ఒంట్లోని వేడిని తగ్గించే గుణం ఉండటంతో శరీరాన్ని వాతావరణానికి అనుగుణంగా చల్లబరుస్తుంది.

కొత్త పెళ్లికూతుళ్లు ఆషాఢంలో గోరింటాకు ఎందుకు పెట్టుకుంటారు?

ఆషాఢంలో కొత్త పెళ్లికూతుళ్లు పుట్టింటికి చేరుకోవడం ఆనవాయితీ. ఆ సమయంలో చేతులకు పండించుకునే గోరింట వారికి తమ సౌభాగ్యాన్ని గుర్తుచేస్తుంది.

మార్కెట్‌లో దొరికే మెహందీ కోన్లు సురక్షితమేనా?

చాలా కోన్లలో కృత్రిమంగా ఎరుపు రంగు తెచ్చే రసాయనాలు కలుపుతారు, వీటివల్ల అలెర్జీల ప్రమాదం ఉంది. సహజ గోరింటలోని లాసోన్ అనే రసాయనం వల్లే ఎరుపు రంగు వస్తుంది, కాబట్టి తాజా గోరింటాకునే వాడటం మంచిది.

ఆషాఢం కాకుండా ఇంకా ఎప్పుడు గోరింటాకు పెట్టుకుంటారు?

అట్లతద్దినాడు, శుభకార్యాల సందర్భాల్లో కూడా గోరింటాకు పెట్టుకోవాలని పెద్దలు సూచిస్తారు. ఏడాదికి కొన్నిసార్లైనా గోరింట అందించే ఆరోగ్యాన్ని పొందాలన్నది వారి ఉద్దేశం.

ఆషాఢంలో గోరింటాకు కోయడం చెట్టుకు హాని చేస్తుందా?

ఆషాఢం నాటికి గోరింట చెట్టు లేత ఆకులతో కళకళలాడుతుంది, అప్పుడు కోయడం వల్ల చెట్టుకి ఏమంత హాని కలుగదు. పైగా లేత ఆకులతో చేతులు ఎర్రగా పండుతాయి.