ఆవేశం అనర్థం: కోపాన్ని అదుపులో ఉంచడం ఎలా?

జీవితంలో ప్రశాంతత కోసం కోపాన్ని జయించండి

కోపం అనేది ప్రతి మనిషిలోనూ సహజంగా ఉండే భావోద్వేగం. అయితే, కొందరి ముఖాలు ఎప్పుడూ కోపంతోనే కనిపిస్తాయి. వారు ఎవరిని పలకరించినా, ఎవరు వారిని పలకరించినా, కోపంగా లేదా విసుగ్గా స్పందిస్తారు. ఇలాంటి వ్యక్తులతో సంభాషించడానికి జనం భయపడతారు. కుటుంబ సభ్యుల పరిస్థితి మరింత దయనీయంగా ఉంటుంది. అటువంటి వ్యక్తులకు స్నేహితులు తక్కువగా ఉంటారు, ఎందుకంటే స్నేహం చేయడానికి ఇతరులు జంకుతారు.

కోపం ఎందుకు వస్తుంది?

కొందరు చిన్నప్పటి నుండి కుటుంబ నేపథ్యం కారణంగా కోపంగా ఉంటారు. మరికొందరు జీవితంలో ఎదురైన కష్టాలు, దురనుభవాల వల్ల కోపజీవులుగా మారతారు. చిన్నపాటి కోపం అప్పుడప్పుడూ కనిపించడం సహజం. ఇంట్లో లేదా కార్యాలయంలో కొంత కోపం ప్రదర్శించడం వల్ల క్రమశిక్షణ ఏర్పడవచ్చు. కానీ, కొందరిలో కోపం బయటకు కనిపించకుండా లోపలే దాగి ఉంటుంది, ఇది మరింత ప్రమాదకరం.

ఆవేశం: కోపం యొక్క తీవ్ర రూపం

కోపం అదుపు తప్పితే ఆవేశంగా మారుతుంది. ఆవేశం మనిషి విచక్షణను, వివేకాన్ని కోల్పోయేలా చేస్తుంది. ఆ సమయంలో మనం ఏం చేస్తున్నామో మనకే తెలియదు. ఇంట్లో భార్య, పిల్లలను లేదా బంధువులు, స్నేహితులను తిట్టడం, అవసరమైతే హింసించడం కూడా జరిగవచ్చు. ఒక వ్యక్తి మీద పగ, ద్వేషం లేదా అయిష్టం ఉన్నప్పుడు, ఆ వ్యక్తి ఏం చేసినా తప్పుగానే కనిపిస్తుంది. ఇలాంటి సందర్భాల్లో ఆవేశంతో తప్పుడు నిర్ణయాలు తీసుకోవడం, గాయపరచడం, లేదా తీవ్రమైన సందర్భాల్లో హత్య వంటి నేరాలకు పాల్పడవచ్చు. ఇవి జీవితాన్ని నాశనం చేసే పరిణామాలకు దారితీస్తాయి.

ఆవేశం యొక్క పరిణామాలు

ఆవేశంతో చేసిన తప్పులు—మానభంగం, హత్య, గాయపరచడం—తర్వాత చింతించడం వల్ల ఉపయోగం లేదు. ఇలాంటి చర్యల వల్ల బాధితులు జీవితాంతం బాధపడతారు, మీ జీవితం కూడా జైలు శిక్షలతో నాశనమవుతుంది. కొందరు యువకులు, యువతులు ప్రేమలో విఫలమైనప్పుడు ఆవేశంతో కక్ష సాధింపు చర్యలకు పాల్పడతారు. ఇటీవల యువతులు కూడా ఇలాంటి ప్రవర్తనలో కనిపిస్తున్నారు.

సామాజిక పరిణామాలు

కొన్ని కులాలు, మతాల మధ్య ద్వేషం, పగల వల్ల సమాజంలో హింసాత్మక సంఘటనలు జరుగుతాయి. ఇవి ప్రశాంతమైన వాతావరణాన్ని కలుషితం చేస్తాయి, ప్రజలను భయభ్రాంతులకు గురిచేస్తాయి. ఈ ఆవేశం సామాజిక సామరస్యాన్ని దెబ్బతీస్తుంది.

కోపాన్ని అదుపు చేయడం ఎలా?

కోపం ఆవేశంగా మారుతున్నప్పుడు, ఆ ప్రదేశం నుండి దూరంగా వెళ్లిపోండి. లేదా, పక్కకు వెళ్లి ఒకటి నుండి వంద వరకు నిదానంగా లెక్కించండి, ఊపిరి తీసి వదలండి. అన్నింటికంటే ముఖ్యం—మీరు మీ అదుపులో ఉండాలి. చిన్న గొడవలు పెద్దవిగా మారకుండా, సారీ చెప్పి రాజీ పడండి. ఇది మీ జీవితాన్ని సాఫీగా, ఒడిదుడుకులు లేకుండా సాగేలా చేస్తుంది.

జీవితంలో ప్రశాంతత

మీరు దారిలో రాళ్లు కనిపిస్తే, వాటిని పక్కకు తప్పించి ముందుకు సాగుతారు, కానీ వాటితో తల బాదుకోరు. అలాగే, జీవితంలో కష్టాలు ఎదురైనా, ప్రశాంతంగా ఉండి వాటిని ఎదుర్కోండి. మీ ఆశయం మీకు గుర్తుంటే, ఆవేశం రాదు. ఆవేశాన్ని అణచివేసి, మీ ఆలోచనలకు పదును పెట్టండి.

ముగింపు

కోపం మరియు ఆవేశం మీ జీవితాన్ని, సంబంధాలను నాశనం చేయవచ్చు. నవ్వుతూ, చలాకీగా ఉంటే స్నేహితులు, సామాజిక గౌరవం పెరుగుతాయి. ప్రశాంతమైన మనసుతో మీ గమ్యాన్ని చేరుకోండి.

అందరికీ శుభం కలగాలని కోరుకుంటూ
బి. మల్లికార్జున దీక్షిత్
*ఫ్యామిలీ కౌన్సిలర్ & కౌన్